Vilja menn byltingu? - stjórnvöld þurfa að taka á honum stóra sínum.

Fyrrverandi og núverandi starfsmenn og stjórnendur eru í skilanefndum bankanna.

Bankastjóri ráðinn án auglýsingar getur ekki gert hreint fyrir sínum dyrum um meint hlutabréfakaup.  

Bankastjóri ráðinn án auglýsingar í banka sem í skjóli nætur lætur fjármálamann ná yfirburðum á fjölmiðlamarkaði, án þess að spyrja Alþingi eða Samkeppnisstofnun, hvort það sé heppilegt eða löglegt.  Eða hvað?

Fjármálabullur vaða enn uppi í þjóðfélaginu og stjórnvöld horfa enn aðgerðalaus á atburði eins og  sauðheimskur búpeningur. 

Stjórnvöld beygja sig undir margmisheppnaða aðferðafræði IMF um stýrivaxtahækkun í kreppu. 

Meintar afskriftir á skuldum starfsmanna í einum af núverandi ríkisbönkum um jafnvel tugi miljarða. Stjórnarmaður frá 2001 - 2008 kannast ekki við að stjórn hafi samþykkt slíkt.

Fjármálaeftirlitið sem átti að líta eftir fjármálastofnunum, er nú að líta eftir aðgerðum sjálfs síns.   Skilanefndir bankanna eru settar á stofn af Fjármálaeftirlitinu og starfa í umboði þess. 

Dómsmálaráðherra kallar eftir skýrslu um atburði á fjármálamarkaði.   Tveir menn sem eiga syni á vettvangi, fóru í verkið.  Annar hefur sagt sig frá því en hinn ekki. 

Stjórnvöld beina því til banka að ganga ekki hart fram við almenning og frysta lán.  Samt berast stöðugar fréttir af fantaskap banka við almenning.  

Nóg var nú komið en stöðugt bætist við listann yfir stöðu mála sem eru gjörsamlega óásættanleg í þjóðfélagi okkar.   

Stjórnmálamenn gera sér augljóslega enga grein fyrir þeirri gífurlegu reiði almennings yfir nýjustu fréttum.  

Aldrei hefði maður átt von á því sem hefur á daganna drifið að undanförnu, ekki frekar en byltingu en hvað veit maður, ef stjórnvöld taka sér ekki tak.  

Það er a. m. k. ljóst að við næstu endurskoðun stjórnarskrárinnar verður að setja inn nýtt ákvæði.  Að meirihluti kjósenda, á hverjum tíma, geti krafist þingkosninga þegar í stað, telji meirihluti kjósenda að sitjandi Alþingi og ríkisstjórn standi sig ekki.  

Það er a. m. k. óskemmtilegt þegar meirihluti þeirra stálheiðarlegu borgara sem maður hittir daglega, segist vilja bylta stjórnvöldum og meina það.   

   

Óþolandi að líða fyrir tortryggni