Veitir sannanlega ekki af endurmenntun en hún á að vera árlega.

Ekkert var kennt um hleðsluútreikinga og jafnvægi í meiraprófinu þegar ég tók það fyrir áratug.

Ekkert um útreikninga á samspili hraða og vinds sem blæs frá hlið. 

Ekkert um áhrif miðsóknarkrafts í beygjum (Sem almennt er frekar kallað miðflóttaafl.)

Ekki var við frábæra kennara ökunámsins að sakast.  Námsefnið var einfaldlega ófullnægjandi. 

Bæði í flug- og siglinganámi er strax í upphafi farið vel í þessa þætti sem skipta gríðarlegu máli.

Og þeir skipta ekkert minna máli í akstri stórra ökutækja heldur en í flugi eða siglingum.

Árlega fréttist af ökutækjum sem eru að fjúka út af vegum eingöngu vegna þekkingarleysis.

Oft eru þetta frábærir bílstjórar svo langt sem það nær en meiri menntun vantar einfaldlega.

Í tilteknu dæmi væri hægt að aka stærstu gerð af fulllestuðum bíl af öryggi í mesta mögulega vindi frá hlið. 

Svo fremi sem að þyngdarpunktur farmsins stæði ekki óvenju hátt og að ekki væri hálka eða snjór á veginum.

Í sama tiltekna dæmi væri hins vegar alveg öryggt að bílinn myndi fjúka á hliðina væri hann ólestaður. 

Nákvæmlega svona dæmi sáum við þegar flutningabíll, með tengivagni, fauk á hliðina á Borgarfjarðarbrúnni í fyrra. 

Bílstjórinn var afbragðsmaður úr Borgarfirðinum og ekki við hann að sakast að námsefninu sé ábótavant. 

Þarna er skiptir máli flatarmálið á hlið bílsins, hæð hans, breidd, þyngdarpunktur, þyngd, hjólbarðar og lögun bílsins. 

Einnig vindhraðinn, vindátt, yfirborð vegarins, snjór, hálka, bleyta, landslag og hraði bílsins.

Hjólhýsi eru dæmi um ökutæki sem eru sérstaklega létt miðað við rúmmál sem tekur á sig vind.

Almenn ráðlegging söluaðila hjólhýsa hefur einatt verið að ekki sé ráðlegt að aka með þau í vindi sem er yfir 15 m/s. 

Við einhvern tiltekinn vindstyrk er einfaldlega öryggt að þau munu fjúka út af veginum.

Lítill munur er á ólestuðum sendibíl og hjólhýsi í þessu tilliti og það sama gæti átt við um rútur.  

Það ergilegasta er svo að á vefnum liggja fyrir allar nauðsynlegar upplýsingar um þessi mál. 

Frábærar skýrslur á vef Rannsóknarnefndar umferðarslysa, frábærar skýrslur verkfræðinga á vef Vegagerðarinnar.

En efni þeirra þarf að komast til þeirra sem aka þessum stóru bílum, ásamt hliðstæðum upplýsingum úr öðrum áttum.  

Til þess eru endurmenntunarnámskeið besta leiðin.  

En þau eiga að vera á hverju ári en ekki á fimm ára fresti og snúast fyrst og fremst um öryggismál.  

   

Bílstjórar skikkaðir á skólabekk

Athugasemdir

[Guðlaugur (IP-tala skráð) 9.11.2012 kl. 17:17]

Ég get eiginlega ekki annað en verið sammála Þórði Þ. Það sem hinsvegar vantar og þarf að taka á núna er aldur þeirra manna og kvenna sem eru að aka bæði leigu-, vöru- og fólksflutningabílum. Það er undarlegt í meira lagi að núverandi lögjöf heimilar EKKI manni sem er yfir að mig minnir 71 árs aldurinn að aka leigubíl á stöð. Sami aðili má aka rútu sem tekur 70 manns. Þarna er eitthvað stórkostlega bogið. Ég ætla ekki endilega að bera saman flugmenn og bílstjóra en rúta sem tekur 50 manns er með jafnmarga farþega og Fokker flugvél getur teki. Í flugi eru stífar aldursreglur og mér finnst að þær ættu líka að gilda um atvinnuökumenn. Menn geta alltaf misst heisluna og orðið óvinnufærir. Það getur hent unga sem gamla, líkurnar eru kannski meiri hjá þeim sem eldri eru og vonandi falla þeir ekki frá undir stýri með fullan bíl af fólki. Það er mín skoðun að hér þurfi að setja aldurstakmörk. Fólk yfir 70 ára aldri á ekki að hafa heimild til þess að aka leigu-, vöru- eða fólksflutningabifreiðum.

 Kv Gs. 

[Elli (IP-tala skráð) 9.11.2012 kl. 17:48]

Væri ekki nær eins og þú seigir að koma þessu í Meiraprófið sjálft í stað þess að setja þetta upp á námskeiði sem tekur 35 stundir á 5 ára fresti ? ég þurfti allavega að hlusta á ökukennaran minn seigja frægðarsögur af sjálfum sér til að fy6lla uppí tíman sem hann "þurfti" að kenna okkur. Svo er talað um að í þessu námskeið eigi að fjalla um eldsneytiseyðslu sem er gott og gilt en flestir þessara bíla sem keyra orðið um slóða Íslands eru "Sjálfskiftir" og eru með hugbúnað sem gírar í samræmi við olíusparnað og lítið sem maður getur skift sér af því þannig að það eina sem eftir er í eldsneytissparnaði er að keyra í samræmi við umferð og umferðaljós  

[Viggó Jörgensson, 9.11.2012 kl. 19:29]

Sæll Guðlaugur.

Ég er sammála ykkur Þórði að það er fráleitt að menn þurfi að fara í 35 vikna endurmenntun á einu og sama árinu.

Minna má nú gagn gera.

Sjötíu ára aldurstakmarkið hjá leigubílstjórum er fyrst og fremst til að fækka í stéttinni.  

Fráleitt að einhver sem getur ekið fólksbíl geti þá ekki alveg eins ekið leigubíl. 

En það er ekki sjálfgefið að sá sem getur ekið leigubíl, geti ekið stórum bíl.   Komist upp á pallinn eða sett undir hann keðjur. 

En ég er sammála þér um að einhver aldurstakmörk eigi hér við.

Áður en að því kemur ætti frekar að fjölga læknisskoðunum með aldrinum eins og er hjá flugmönnum.    

Þakkir fyrir athugasemdina. 

[Viggó Jörgensson, 9.11.2012 kl. 19:35]

Sæll Elli.

Auðvitað ættu allar nýjungar að vera kenndar í meiraprófinu, um öryggi, svefntímareglur, sparakstur og hvað það nú heitir. 

En það er fjöldi manna sem aldrei lærði neitt um þetta í sínu ökunámi.   Sumir kunna þetta allt saman prýðilega fyrir því en aðrir síður.  

Á meiraprófsnámskeiðinu fór allt of mikill tími í að útskýra vinnutímareglur, aftur, aftur og aftur.

Eitthvað sem viðkomandi fyrirtæki ættu frekar að ítreka.

Endurmenntunarnámskeið ættu að snúast um öryggi en ekki eldsneytisnotkun eða mengun eins og þú vísar til. 

Þakkir fyrir athugasemdina.  

[GunniS, 10.11.2012 kl. 01:12]

ég rendi svona lauslega yfir þetta hjá þér og margt af því er athyglisvert, en ég tók meiraprófið kringum 2005 og ég fer svo nokkru seinna eða um 2007 að keyra steypubíl, þar er manni bent á hvar þingdarpunktur bifreiðar er, að hann er miklu hærri en á öðrum bílum. t.d þú ferð ekki hratt í beygju á steypubil nema þú viljir velta honum.  t.d mikilvægt að gefa sér góðan tíma á þannig tæki.

annað sem mig langar að minnast á að í meiraprófinu fengum við bók þar sem komið er inni á öryggisatriði sem varðar hleðslu farms og jafnvægi, svo ég held þú verðir eitthvað að skoða hvað hefur verið endurbætt síðan þú tókst prófið. 

svo langaði mig að spyrja þig hvort þú vitir um einhvern vinnustað á íslandi þar sem farið er eftir hvíldarreglum, ég veit það er ekki gert í steypubransanum , samt er okkur gert að fylla út skífu fyrir ökuritann á hverjum degi. t.d segir í hvíldarreglum að vinna kringum bílinn t.d við að aflesta hann, telst ekki sem hvíld. samt virðist sem það gildi ekki um steypubíla. 

ég t.d sá ýmislegt skrítið þegar ég var í vinnu við akstur, til dæmis að rútur eru ekki með hraðatakmarka í 90km, en steypubilar eru það ekki. og hvíldartímareglur gilda alls ekki fyrir þá sem vinna við að keyra fólk.  í hnotskurn er það viðhorf sem ríkir varðandi vinnutíma, það að reglurnar segja að þú eigir að fá 8 tíma svefn. það þýðir að það er hægt að hafa þig í vinnu frá 8 til 10 á kvöldin alla daga vikunar. og það var einmitt það sem var gert þegar ég var að keyra steypubíl. og svo skildu þeir ekkert í því afhverju ég hafði ekki áhuga á vinnu um helgar. 

[GunniS, 10.11.2012 kl. 01:15]

eða smá ritvilla þarna hjá mér með hraðatakmarkann, en hann er í steypubílum. en ekki í rútum.

[Viggó Jörgensson, 10.11.2012 kl. 02:13]

Kærar þakkir GunniS.

Það gleður mig að heyra að byrjað sé að kenna meira um jafnvægi og hleðslu en var þér kennt að reikna þetta út?

Það gleður mig einnig að heyra að steypufyrirtækin bendi mönnum á að vera vakandi fyrir þessu.

Það hefur hins vegar ekki átt við um þessa tvo glerbíla sem veltu með stuttu millibili á litlum hraða í slaufunum nærri Ártúnsbrekku.   

Ég þekki nákvæmlega ekkert til um framkvæmd á hvíldartímareglum.

Ég veit það ekki en býst hins vegar við að menn eigi síður von á að bílstjóri geti sofnað innan um farþeganna. 

Mér var kennt að farþegar litu eftir ökumönnum.  Þeir sem væru bílhræddir settust fremst og fylgdust vel með. 

Ef þetta er lengra ferðalag, fylgjast þeir með því hvort að bílstjórinn neyti áfengis á kvöldin og hvort að hann fari tímalega að sofa. 

Það sé meiri hætta með þá sem eru "alltaf" einir á ferð svo sem í flutningabílunum og þess vegna sé meira lagt upp úr eftirliti með hvíld þeirra.

Kannski á það sama við um að hraðatakmarkarar séu settir í bíla þar sem bílstjórar eru einir en treyst á að farþegar kvarti yfir hinum. 

Kærar þakkir fyrir innlitið og þessar upplýsingar.   

[GunniS, 10.11.2012 kl. 03:53]

ég skil ekki alveg hvert þú ætlar að fara með þetta meirapróf, á krafan kannski að verða sú að menn hafi háskólamenntun í stærðfræði til að meiga taka meirapróf ?  ég held að almenn skynsemi sé meira virði og geta notað hana, það hefur komið ansi mörgum vel. 

ég þekki ekki til hvernig ökumenn voru sem keyrðu þetta gler, eða hvaða reynslu þeir hafa haft, en eins og ástandið er á vinnumarkaðnum í dag þá á að vera mikið framboð á bílstjórum með reynslu. en ,. ég manni er farið að gruna það að ýmis flutningsfyrirtæki eins og t.d eimskip séu að ráða útlendinga mikið í vinnu, og þar er ekki mikið hægt að athuga með reynslu viðkomandi. og þetta er gert til að "spara" og útlendingar leita ekki réttar síns þegar þeim er borgaður jafnaðartaxti. ég t.d sjálfur reglulega fylt út umsókn á heimasíðu eimskips í mörg ár, en aldrei fengið vinnu þar.  finnst þér það ekki pínu skrítið.  ?

en með hraðatakmarkanir í bílum, það er svolítið til sem heitir hraðablinda, fólk fattar áttar sig ekki oft hvað er farið hratt. eða finnst þér eðlilegt að rúta full af fólki taki fram úr uppi á hellisheiði og til að gera það þá þarf hún allavega að ná 120 til 130 km hraða. þar sem hámarkshraði er 90. nú og afhverju þarf rúta að taka fram úr ef steypubílinn er á 90 þar sem hámarkshraði er 90 ? 

en ég giska að íslendingar muni aldei getað sett reglur um vinnutíma eins og t.d norðmenn hafa gert. og mér var sagt að þeir hefði sett þær reglur um vinnutíma sem þar gilda, svo allir gætu notið góðs af. sér maður svona hugsunarhátt á íslandi ?

[Stefán Stefánsson, 10.11.2012 kl. 15:06]

Gunni minn, það væri nú rétt að þú kynntir þér aksturs og hvíldartímareglurnar og eins um hraðatakmarkarana áður en þú tjáir þig eins og hér.

Rútur eru líka með hraðatakmarkara eins og vöruflutningabílar.

Löglegur hámarkshraði á rútu er 90 km/klst og hraðatakmarkarinn er stilltur á 100 km/klst þannig að rútan kemst bara í 100 km/klst nema niður brekkur.

Á vöruflutningabílum er það 80 km/klst og takmarkarinn stilltur á 90 km/klst.

Þetta á að sjálfsögðu líka við um steypubíla.

Aksturstímareglurnar eru þannig að daglega má aka 9 klst í heildina og lengja tímann í 10 klst þrisvar í viku, en aka þó að hámarki 90 klst á tveggja vikna tímabili.

Eftir 6 daga vinnu skal þó taka 36 klst í hvíld.

Eftir hámark 4,5 klst akstur skal taka 45 mínútna hlé frá akstri o.s.frv.

Þetta endurmenntunarnámskeið er meira gert fyrir umferðarskólana heldur en bílstjórana og þjónar ekki þeim tilgangi að auka öryggi á vegum ef þetta verður svona eins og talað er um.

Á Íslandi eru skýrar reglur um vinnutíma. Þeim er kannski ekki framfylgt eins strangt eins og í Noregi.

[GunniS, 10.11.2012 kl. 16:15]

stefán, ég vann við að keyra stepubíl í um ár - og þar var ekki spurt hvort þú vildir vinna yfirvinnu. og þegar ég tala um að rúta hafi tekið fram úr mér uppi á hellisheiði, og líka á leið til keflavíkur þegar ég er á 90 km hraða , þá bendir það varla til að það séu hraðatakarkari í þeim rútum er það ?

aftur varðandi hvíldartíma, Þá er ég að benda á að það fer einginn eftir þeim. þó mönnun sé gert skilda til að fylla út skífu í ökuritann á hverjum degi.

[GunniS, 10.11.2012 kl. 16:18]

nokkrar innsláttarvillur þarna, vona þeir séu fyrirgefnar.

[GunniS, 10.11.2012 kl. 16:33]

nokkrar innsláttarvillur þarna, vona þær séu fyrirgefnar.

[Stefán Stefánsson, 10.11.2012 kl. 16:36]

Það eru hraðatakmarkarar í rútum og þær fengju ekki skoðun án þeirra og svoleiðis er það búið að vera í a.m.k. 10 - 15 ár, en eins og ég sagði eru rúturnar stilltar á 100 kmh vegna þess að þær mega keyra 10 kmh hraðar en vörubílar.

Bæði þú á steypubílnum og rútan hafa því verið að brjóta lögin í umræddum tilvikum sem þú vitnar til.

Ef ég man rétt eiga allir bílar yfir 3,5 tonnum sem skráðir eru í dag að vera búnir ökurita og hraðatakmarkara.

Það er tómt bull og vitleysa hjá þér að enginn fari eftir reglum um aksturs og hvíldartíma. Allflestir gera það, en auðvitað eru svartir sauðir innan um sem geta ekki farið eftir neinum reglum.

Ég hvet þig til að kynna þér þessar reglur.

[GunniS, 10.11.2012 kl. 23:33]

stefán, það er lítið vit í að hafa 90km hámarkshraða en takmarka hraða ökutækja við 80km, ´þú þarft ekki annað en keyra sæbrautina til að sjá að menn keyra ekkert þar á 60 sem er hámarkshraði. með reglur um akstur og hvíldartíma, þá skilst mér að það nýjasta í dag er að fyrirtæki neita að borga frítökudaga sem menn vinna, og fyrst þeir komast upp með það, hvað stoppar fyrirtæki í að hóta mönnum uppsögn ef þeir fara að röfla um hvíldartímareglur bílstjóra. það eru ekki mörg fyrirtæki sem selja steypu, farðu og talaðu við menn þar um hvort það sé farið eftir hvildarreglum bílstjóra. greinlegt að þú trúir engu sem ég segi, en ég á enn þá launaseðla og annað , svo það er auðvelt að sjá vinnutímann.

[Viggó Jörgensson, 11.11.2012 kl. 01:22]

Nei nei GunniS ég er ekki að tala um flókna stærðfræði í ökunámið.

Ef þú tekur einkaflugmannspróf, skemmtibátapróf eða 30 tonna réttindin, þá ertu látinn reikna út ýmsar útgáfur af hleðslu og jafnvægi. 

Til þess að átta þig betur á því hvernig þessir hlutir breytast.  Það er eitthvað sem ekki er hægt að átta sig nákvæmlega á með almennri skynsemi.

En eins og ég segi og það við ykkur Stefán báða, þá veit ég ekkert um framkvæmd á vinnutímareglum og tek ekki þátt í þeirri umræðu.

Um hraðatakmarkara veit ég ekkert heldur nema að ég á gamla rútu sem skráð er hópbifreið II B og hún er ekki búinn hraðatakmarkara og engar kröfur verið gerðar um það.  

En þakka ykkur báðum fyrir upplýsingarnar.  

[GunniS, 11.11.2012 kl. 03:09]

þú fyrirgefur en mér finnst þessi stærðfræði della í þér svo fáránleg. ef þú ert t.d að fljúga flugvél, þá giska ég þú komir ekkert að því að hlaða í hana farangri ef þetta er stór farþegaflugvél, ef þú ert að lenda flugvél, þá giska ég það þú hafir engann tima til að taka upp reiknivélina. það er svipað með steypubíl, það myndi gefa meiri tilfinningu fyrir farminum að setjast upp í fullhlaðinn bíl og keyra hann, en reikna út eitt og annað. ætlaru kannski að taka um reiknivélina áður en þú ferð að stíga á helmana og reikna út hvenær þú þarft að byrja að hæga á bílnum ? væri miklu nær að prófa það sjálfur í akstri. en aftur er það almenn skynsemi sem segir manni eitt og annað.

[GunniS, 11.11.2012 kl. 03:20]

svo finnst mér líka lélegt að þú segir þig alveg frá því að tjá þig um framkvæmd hvíldarlaga, en vilt láta innleiða meiri stærðfræði í meiraprófið eins og það muni bæta umferðamenningu og fækka slysum ?

[Viggó Jörgensson, 12.11.2012 kl. 17:52]

Já við verðum bara að vera ósammála um þetta.

Ég er ekki að tala um stærðfræði, frekar einfalda útreikninga til að átta sig á takmörkunum hvers tækis fyrir sig.

Ef ég væri að aka steypubíl myndi ég vilja vita:

Hvenær veltur hann óhlaðinn, fullhlaðinn, það er að segja í hvaða halla, í gráðum talið.  Er það t. d. 12° hliðarhalli, 18° eða 23° 

Á hvaða hraða veltur hann hlaðinn og óhlaðinn í beygjum með mismunandi radíus.   

Í t. d 90° beygju, veltur hann á 7 km hraða, 12 eða 15?

Eða í dæmigerðri slaufubeygju, í kringum mislæg gatnamót.  

Veltur bíllinn á 12 km/klst, 28 km/klst,  eða er það 35 km/klst?       

Ef ég vissi þetta, hvort sem ég eða einhver annar hefði reiknað það, þá væri ég mun öruggari við aksturinn og þyrfti ekki að læra af reynslunni.

Almenn skynsemi mín segir mér ekkert um það hvar þessi mörk eru, fyrr en ég er búinn að velta bílnum.

Menn eru enn að velta bílum vegna þess að þeir vita ekkert hvar þessi mörk liggja.

Sjáðu þessa skýrslu:

http://www.vegagerdin.is/vefur2.nsf/Files/Haettulegarbeygjurathjodvegi1/$file/H%C3%A6ttulegar%20beygjur%20%C3%A1%20%C3%BEj%C3%B3%C3%B0vegi%201.pdf

[Viggó Jörgensson, 12.11.2012 kl. 17:59]

Kíktu á þessa skýrslu

Lestu textann og slepptu bara öllum útreikningum ef þér leiðast þeir. 

http://us.is/Apps/WebObjects/US.woa/swdocument/3602/Farmsk%C3%BDrsla.pdf