En verða kannski kyrrsettar?

Ekki veit ég hvort yfirvöld eiga eitthvað óuppgert við Hannes Smárason.

En standi þar eitthvað út af borðinu hlýtur þessi fjárhæð að verða kyrrsett af yfirvöldum. 

Við Hannes erum gamlir vinnufélagar úr BYKO og ég get auðvitað staðfest eins og aðrir.

Að þetta er einn mesti snillingur sem þjóðin hefur átt, eins og þáverandi tengdafaðir hans útskýrði fyrir okkur. 

Hinn hamingjusami snillingur, Hannes sjálfur, staðfesti fúslega, af alkunnu lítillæti, að þetta væri rétt hjá elskulegum tengdaföður.   

Við dauðlegir starfsmenn, sem ekki vorum snillingar, skildum auðvitað aldrei þessa snilld, sem ekki var við að búast.

En svo flinkur var Hannes að hann átti bara eftir að ganga á vatni, eins og einhver náði að koma því réttilega í orð.     

Það var mikil gæfa fyrir þjóðina þegar Hannes Smárason kom heim frá Ameríku. 

Þar hafði hann lært hina svokölluðu fjármálaverkfræði sem varð oss eitt aðalhjálpræðið á nýrri öld. 

Þegar Hannes var orðinn leiður á að sendast fyrir þáverandi tengdaföður sinn í BYKO. 

Fór hann að vinna fyrir fyrir félaga sinn úr körfuboltanum í Boston.

Sá heitir Kári Stefánsson og var líka að koma nýjum hjálpræðum til landsins á þessum tíma. 

Var það almennt þekkt undir nafninu DeCode sem kannski á eftir að gera fleiri góða hluti. 

Þeir Hannes og Kári, eða félagið, fóru svo að selja hlutabréf í DeCode á svokölluðum gráum markaði.

Það er að selja hlutabréf manna á milli, áður en það fyrirtæki er komið á opinberan markað í kauphöll. 

Liprir piltar í bönkunum aðstoðuðu við þessi nýmóðins viðskipti t. d. Bjarni Ármannsson svo einhverjir séu nefndir. 

Þær flökkusögur komust á kreik í bænum að þetta yrði gróðatækifæri aldarinnar.

Og alltaf kom ein og ein tilkynning frá fyrirtækinu um að nú hefði þetta uppgötvast eða hitt. 

Og hverju sem það sætti, rann nú nokkuð gullæði á almenning. 

Nafngreindur fermdur drengur, í verðbréfadeild Búnaðarbankans, hikaði ekki við að fullyrða að gengið færi í 200.  

Bankaútibústjórar létu, hvaða heimilisföður sem leit við í bankanum, hafa heilar fimm miljónir kr. til að kaupa í DeCode. 

Svo var það dag nokkurn árið 1999, eða 2000, að þeir Kári og Hannes neyddust til að selja áður en gengið kæmist í 200. 

Hvort þeir voru svo óheppnir að eiga eitthvað eftir vona ég ekki, því skyndilega hrundi gengið á bréfunum.  

Hið gráa gengi var þá ekki komið í tæplega 200, heldur aðeins 64 dollara á hlut.

Guði sé lof, þá sluppu þeir Hannes, Kári og fleiri við stórkostlegt tjón, og fyrir horn í grænum dollurum.   

Höfðu vonandi ekki þurft að greiða nema fáeina dollara á hlut í upphafi. 

Nóg samt að missa af þessum mun á 64 og 200.

En hjá hinum nýríku heimilisfeðrum dró nú nokkuð úr gleðinni. 

Er fengu þeir bréf frá hinum ráðhollu bankaútibússtjórum þar sem þeir voru beðnir að líta við í bankanum. 

Já og hafa með sér þessar fimm miljónir og auðvitað vextina. 

Bankinn gat svo sem tekið íbúðina eða húsið upp í, en það var sko meira vesen. 

Og þar hafiði nú námsefnið í fjármálaverkfræði 103, samkvæmt þeim glósum sem ég rýndi í.   

Já og nú var Hannes sem sagt orðinn ríkur út af þessari tilviljun að selja bréfin áður en verðið hrundi.

Og þá fengum að njóta áframhaldandi leiðbeininga, í fjármálaverkfræði, og nýmóðins viðskiptum.

Einhverjir muna kannski eftir Flugleiðum sem varð að FL group, en það tilheyrir eiginlega fjármálaverkfræði 203. 

Ég þarf að finna til glósurnar úr þeim áfanga. 

Hagfræðingurinn sem gaf mér þessar snjáðu glósur var í Háskóla Íslands á umræddum tíma.

En þið skuluð vara ykkur á sannleiksgildinu á þessum DeCode þætti þeirra Hannesar og Kára. 

Þessi hagfræðingur var í stúdentapólítíkinni með Bjarna Ármannssyni, Sigurjóni Árnasyni og Hreiðari Sigurðssyni. 

Og því gætu þið haldið að þetta væri heiðvirður maður.   En það er ég ekki svo viss um. 

Ég hafði hann alltaf grunaðan um að kjósa Röskvu og jafnvel Samfylkinguna. 

Og þá er þetta auðvitað allt saman lygi, djöfuls lygi eða tölfræði hjá manngrýlunni. 

En BYKO þáttinn geta margir borið um, auk þess sem ég sver hann við arfinn eftir ömmu.

(Ég fékk neðri tanngóminn af því að efri gómurinn fór frænku minni svo vel). 

 

Hannes fær 350 milljónir króna

Athugasemdir

[Kristján B Kristinsson (IP-tala skráð) 8.12.2011 kl. 11:26]

Verðbréfaviðskipti eru og verða alltaf happdrætti, vandamálið er að lög og reglur eru kannski ekki nógu skýrar og menn komast upp með að fara í kringum það, við leysum ekki vandann með því að eltast við verðbréfaviðskiptafólk sögunnar heldur með því að setja betri lög og reglur og eftirfylgni til framtíðar.

[Viggó Jörgensson, 8.12.2011 kl. 14:04]

Sæll Kristján.

Ég er svo sem heldur ekki hjá FME.

En þarna á þessum tíma hafði almenningur enga hugmynd um verðbréfaviðskipti yfirleitt.

Og "sérfræðingarnir" yfirleitt ekki heldur.

Nema þeir sem höfðu lært um bólur sem "mynduðust" stundum á gráum markaði fyrir skráningu.

Eitt hrikalegasta dæmið var af gömlum manni sem fór með ævisparnaðinn í Búnaðarbankann.

Hann þekkti að vísu eitthvað til verðbólgu en hans heimsmynd innihélt ekki annað en að bankinn myndi gæta að nafnverði höfuðstólsins sem hann lagði inn í tiltekinni krónutölu.

Einhver krakkinn í bankanum, - afsakið sérfræðingur - lét gamla manninn kaupa í DeCode fyrir alla fjárhæðina.

Gamli maðurinn skildi ekkert hvað krakkinn var að segja og hélt að decode væri einhvers konar trompbók.

Jafnvel bundin, eða verðtryggð, með betri vöxtum.

Þegar gamli maðurinn fékk svo síðar þær fréttir að allir peningarnir hans væru horfnir.

Sat hann í bankanum í hálfan dag og grét.

Þetta sagði mér viðkomandi yfirmaður í bankanum og að hann hefði aldrei, á ævi sinni, lent í því verra.  

[Guðjón Sigþór Jensson, 8.12.2011 kl. 23:15]

Ja hérna, þetta eru meiri ósköpin.

Sjálfsagt hefur einn maður valdið jafn mörgum jafn miklu tjóni en Hannes þessi að nafna hans Hólmsteini kannski meðtöldum.

Snilld þessa manns var fólgin í því að sölsa undir sig gríðarlega fjármuni og skilja allt eftir í rjúkandi rústum. Slóði fjármálasóðaskaparins er út um allar tryssur.

Þessi maður virðist vera gjörsamlega siðblindur.

Góðar stundir

[Viggó Jörgensson, 9.12.2011 kl. 22:05]

Blessi þig líka.