Lausnin er komin

Ríkisstjórnin sem sór við meydóm sinn að öll mál yrðu uppi á borðum, hefur nú enn einu sinn látið spjallast í óþörfu leyndarpukri.  

En lausnin er komin. 

Stjórnarmenn í Hagsmunasamtökum heimilanna fá allar skuldir felldar niður og forkaupsrétt næstu þrjú árin á öllum ráðherrabílum sem til eru og frítt bensín á þá í 10 ár.  

Bílanna má greiða með bankahlutabréfum á markaðsvirði þeirra fyrir hrun. 

Þeir verða á hinn bóginn að skrá sig í Samfylkinguna og konur þeirra í VG. 

Sama gildir um þá sem börðu sjálfir tunnur á Austurvelli um daginn.  

Svo er samkomulagið trúnaðarmál en stjórnarmennirnir mega þó segja að hérlendis séu allir hlutir í besta lagi eða verði það fljótlega eftir helgi. 

Þeir hafi fengið nýjar upplýsingar og treysti ríkisstjórninni fullkomlega. 

Sumir þeirra mega leggja til að aldrei verði kosið oftar til Alþingis.  Það sé hreinlega óþarfi.  

Að endingu lofa þessir aðilar að koma aldrei aftur á Austurvöll.  

Þetta sagði mér ólygin frænka Steingríms, nú rétt fyrir háttinn, 

og bað okkur fyrir, eins og gefur að skilja.   

Vilji fréttamenn nánari upplýsingar er frænkan Gróa, í síma löng stutt löng í gegnum Kópasker. 

 

Engar upplýsingar veittar um fund