Flest óbrennanlegt í farþegarýminu.

Í eina tíð var reglulega sprautað sérstöku efni á sætaáklæðin og teppin og þar með var ómögulegt að kveikja í þeim.  

Þetta efni fékk ég að prófa er ég vann á Reykjavíkurflugvelli,eitt sumar, vel fyrir aldamót. 

Vinnuveitandinn gerði út DC-6 sem oft var með reykinn aftur úr svona eins og einum hreyfli af fjórum.  Kviknaði einu sinni í þremur hreyflum úti í Rotterdam. 

Einhverra hluta vegna bað ég aldrei um að fá að fara með í þeirri vél.  Tók samt sólópróf og einkaflugmannspróf.   

Ég komst sem sagt að því að innréttingar í farþegarýmum flugvéla eru úr óbrennanlegum eða tregbrennanlegum efnum. Geta í mesta lagi sviðnað en ekki logað.  

Örugglega eru svo komin enn betri efni í dag.   

Oftast eru það yfirbrunnir rafmótorar eða slíkur búnaður sem veldur reyk eða brunalykt í farþegarými.  

Þeir geta ekki kveikt í neinu nema sjálfum sér, að innan, með tilheyrandi reykjarólykt.  

Sama er um hreyflanna.  Stálið í þeim þolir vel þann eld sem þar gæti logað þar til  flugmennirnir loka fyrir eldsneytið til þeirra.

Þegar eldsneytið inni í hreyflinum er búið, er þar í rauninni nær enginn eldsmatur eftir.

Að sjálfsögðu eru svo slökkvikerfi í hreyflunum sem flugmennirnir geta notað til að slökkva í glæðunum.  

Rétt eins og venjuleg eldavél hefur yfirleitt fjórar hellur til að gera það sama eru mörg kerfi með sama hlutverk í stórum flugvélum. 

En í flugvél væri hver hella alveg óháð hinum, með sérstaka raflögn og öryggi fyrir sig.

Bili eitt kerfi af mörgum truflar það flugið ekkert og ekki heldur rafmótor sem brennur yfir með reyk.

Engu að síður er lent á næsta flugvelli til að flugvirkjar komist í málið, þar sem reykingar eru bannaðar í flugvélum, sama hvort í hlut eiga farþegar eða flugvélin sjálf.     

Eldur í híbýlum eða farartækum er alltaf óskemmtilegur en hvergi er betur búið um þá hnúta en í farþegaflugvélum nútímans. 

Það getur maður alltaf huggað sig við í svo óskemmtilegri raun og þakkað hvað við eigum góða flugmenn, ennþá. 

Ríkisvaldið gerir sitt besta til að verðleggja kennsluflug út af borðinu.  

Það verður bara meira spennandi að fá ódýra flugmenn úr einhverjum frumskóginum.    

Kvikni eldur í bifreið er hins vegar full ástæða til að verða skelfingu lostinn og koma öllum út um næstu hurð eða glugga og hirða ekki um farangur.  

Stoppa samt fyrst.   

Reykur í farþegarými