Jafnvel einnig á yngri bíla með tölvuinnsprautun.

Hver og einn ætti skilyrðislaust að athuga eigendahandbók sinnar bifreiðar. 

Nauðsynleg smurefni fyrir olíuverk, og innspýtingarspíssa, díselbíla vantar í steinolíu.

Í handbók með t. d. 10 ára gömlum Mercedes benz stendur að blanda megi allt að 50% steinolíu á móti 50% díselolíu. 

Þetta er bíll með tölvustýrðri innsprautun og sameiginlegri forðagrein.  (Common rail).

Af sjálfu leiðir að málmurinn í innspýtingarspíssunum slitnar hraðar nema bætt sé hlutfallslega við smurolíu, parafínolíu eða einhverju smurefni sem framleiðandinn leyfir. 

Hver innspýtingarspíss kostar frá 50 til 100 þúsund krónur eða meira þannig að eldsneytissparnaðurinn fer fljótt út um gluggann ef rangt er farið að.   

Fjöldi spíssa er yfirleitt 4 til 6 í fólksbílum og 4 til 8 í jeppum og auk þeirra er annar rándýr búnaður sem einnig getur slitnað hraðar ef ekki er staðið rétt að málum. 

Fyrst á að setja smurefnið, þá steinolíuna og síðast díselolíuna til að þau fyrrnefndu blandist vel saman í tanknum.  

Svo má ekki setja of mikið af smurolíu því þá fer bíllinn að reykja bláu og loks svörtu pústlofti. 

Þá sest sót á alls konar fokdýran búnað í vélinni, eykur slit og eyðslu, minnkar virkni og endingu.  

Nýrri bílar með EGR búnaði, (pústhringrás) mega ekki við meira sóti inn á vélina, þá skemmist sá rándýri búnaður fyrr og lokur í soggrein geta misst virkni eða eyðilagst.  

Olíueyðsla stóreykst ef allur þessi búnaður er ekki í besta lagi. 

Sjálfur nota ég ekki steinolíu í mína díselbíla út af öllu þessu. 

Hef ekkert á móti steinolíunotkun en ítreka að menn ættu að spyrja sinn bifvélavirkja eða bílaumboð og fylgja fyrirmælum framleiðenda bílsins nákvæmlega.  

Og fylgjast svo enn betur með ástandi vélarinnar en fyrr.   

Steinolíunotkun er sem sagt ekki eintóm hamingja. 

 

Steinolía notuð í stað dísels

Athugasemdir

[Gunnar Heiðarsson, 7.2.2011 kl. 11:43]

Hér á árum áður, þegar díselolían sem hingað kom var mun verri en í dag, var þetta ráð notað yfir veturinn, enda frost þá mun meiri en í dag. Þetta var nauðsyn, þar sem mikið vax var í olíunni og hún átti til að frjósa í síum.

Þetta var þó aldrei notað nema í neyð og passað vel upp á að blanda smurefni samanvið. Það er fleira en spíssar sem eru í hættu, olíuverkin sjálf fá sína smurnigu úr díselolíunni. Ef það eyðilegst er um stórar upphæðir að ræða.

Sjálfur ek ég á díselbíl, aldrei dytti mér í hug að aka á steinolíu, ekki einu sinni í bland við dísel. Þetta skammtíma hagnaður sem í flestum tilfellum hverfur og gott betur, eftir skamman tíma!

[Axel Guðmundsson, 7.2.2011 kl. 12:32]

Olía sem blönduð er í bensín fyrir tvígengisvélar hefur mikla smureiginleika, og hefur jafnvel verið mælt með henni í bland við dieselolíu gamalla dieselvéla.

[Birgir Guðjónsson (IP-tala skráð) 7.2.2011 kl. 13:04]

Góður puntur Viggó

Hef reynslu af þessu.

Lenti í viðgerð vegna steinolíu sem var sett á bíl sem ég keypti.

Kostaði ófá símtöl við fyrri eiganda, lögfræðing og bílaumboð.

Er fullviss að það var engin sparnaður af þessari blöndu !

[Viggó Jörgensson, 7.2.2011 kl. 19:06]

Sæll Gunnar.

Já mér skilst að þetta sé parafínolía í díselolíunni sem fór í vaxkekki í gamla daga.

Ég nefndi olíuverkið í annarri málsgrein; eins og þú segir allt olíuverkið þarf smurningu. 

[Viggó Jörgensson, 7.2.2011 kl. 19:08]

Sæll Axel. 

Þarna kemur þú sterkur inn.  

Ég hef lesið einhver ósköp um smurolíu en ekki hugleitt þetta sérstaklega; hvort tvígengisolían sé heppilegri.  

[Viggó Jörgensson, 7.2.2011 kl. 19:09]

Sæll Birgir.

Ég er á sömu línu og þú að efast um þennan sparnað þegar upp er staðið.

Ég er þó ekki að tala á móti þessu, aðeins að benda á að þetta er vandasamt og ekki sjálfgefinn sparnaður ef út af bregður.