Læst drif eru einnig nauðsynleg í leðju, leir og sandi. Fjallapróf nauðsynlegt.

Sú fræga Krossá er sérstök vegna sandbleytunnar, hvort sem við köllum það leðju, sand eða leir. 

Á sínum tíma ók ég upp og niður Krossá á þýskum hertrukk af gerðinni Unimog sem er framleiddur af Mercedes Benz. 

Sá Unimog er með kúplingsdisk úr kopar þannig að hægt er kúpla á kafi í vatni og bakka upp úr því sem ökumanni líst ekki á.  

Á Unimog er hægt að harðlæsa bæði fram og afturdrifi þannig að öll hjólin fjögur snúast saman í einu með afli á þeim öllum.   

Vilji maður vera viss um að komast yfir ár með leðjukenndum botni er nauðsynlegt að vera á fjórhjóladrifnum jeppa með læsanlegum drifum.  Sama á við ef ekið er á fjöruleir sem ekki þornar á fjörunni.

Þá á ég við að ekið sé yfir ár á vaði sem ökumaðurinn þekkir, og sé á því stærri trukk sem vatnið og straumurinn er meiri.  

Byrji bíll án læst drifs að vagga undan straumþunga árinnar getur hann oltið í ána á 20 mínútum.  

Stöðvi maður í miðri jökulá í hamförum, byrjar árin undireins að grafa undan hjólum og maður finnur strax hvernig bíllinn fer að halla undan straumnum.   

Við núverandi aðstæður er ekkert vit að vera þarna á ferð yfirhöfuð, nema menn sem eru sérfróðir um Þórsmörk og slíkar aðstæður. 

Og eru auk þess á sérútbúnum bílum, upphækkuðum og með öll drif læsanleg.  

Þetta eru heimamenn í lögreglunni, björgunarsveitunum, vegagerðinni, rútukalla og landslið jeppamanna.   

Skrifstofujeppar og svokallaðir jepplingar eiga aldrei erindi í ár með sandbleytubotni eins og er í Krossá.

Vafasamt er að slík ökutæki eigi að vera á hálendinu nema í samfylgd stærri jeppa.   

Smájeppar og fólksbílar fara á flot eins og þeir væru bátar þegar vatnið er komið yfir miðjar hurðir. 

Undir hælinn er lagt hvort loftinntakið fyrir vélina er í nægilegri hæð. 

Á þessum bílum eru yfirleitt túristar á hjartveikum aldri - hverjum bílaleigan hefur sérstaklega bannað að fara í Þórsmörk eða á aðra hálendisvegi.   Svo sem með Öskju þar sem 20 slíkir hafa þurft aðstoð í sumar.

Jepplinga og litla jeppa á að banna á fjallvegum hálendisins nema ökumenn séu vanir slíkum akstri og orðnir a. m .k. 25 ár. Einbíla eiga þeir ekkert erindi ofan í jökulár né bergvatnsár þekktar fyrir sandbleytu. 

Löngu er orðið tímabært að menn taki sérstakt fjallaökupróf er heimili þeim að aka inn á hálendið. 

 

 

Varað við ferðum í Þórsmörk